Orain aste pare bat Gernikako LIDL supermerkatuaren handitzea dela eta, Los Pirineos fabrika zaharraren 1912ko ur-depositoa bota behar zutela jakin genuen. Apenas egin zitekeen ezer, izan ere, Gernika- Lumoko Udalak baimena eman zion supermekatuen multinazional alemaniarrari bonbardaketa aurreko eraikuntza botatzeko. Hori dela eta, Genikazarra eta Gernika Batzordea elkarteen babesarekin, hainbat gutun bidali ditugu LIDL-en atzerriko egoitzetara alemanieraz, inglesez eta gaztelaniaz, ur-depositoa ez botatzeko eskatuz. Gernika bonbardatu zutenean eraikuntza guztien %85 desagertu zen sugarretan. Gure ustez, egun hartatik zutik geratu ziren eraikin apurrak mantentzea ezinbestekoa da, suntsitu nahi izan zuten Gernika horri eustea ere badelako.
Lidl supermerkatu katearen arduradun agurgarriak:
Gure ondarearen eta gure memoria historikoaren kontserbazioaren alde lan egiten duten Gernika-Lumoko hainbat elkarteren izenean idazten dizuegu. Gernikako bonbardaketan bizirik iraun zutenen ondorengoak gara.
1937ko apirilaren 26an gure herria suntsitu zuen aire-bonbardaketa ikaragarri batek, Alemaniako Kondor Legioak eta Italiako Aviazione Legionariak gauzatutakoa; ehunka pertsona hil ziren eta Gernikako eraikinen % 85 birrindu zituzten. Picassok “Guernica” koadro ezagunean islatu zuen gure herriak bizi izan zuen izugarrikeria.
Duela gutxi jakin dugu bota egingo dutela bonbardaketaren aurretik zutunik jarraitzen duen arkitektura-elementu bakarrenetako bat, zuen jabetzapekoa dena orain. Horretarako argudioa da, egoera txarrean egonik, zuen Lidl Gernika saltokia (Goikoibarra Kalea, 48300, Gernika-Lumo, Bizkaia) egokitzeko lanei eragingo liekeela, eta, horren ondorioz, bota egin behar dela erabaki da.
Gutun honen bidez, mesedez eskatzen dizuegu Los Pirineos fabrikaren antzinako depositua babestea, Gernika-Lumoko herritarrentzat berebiziko garrantzia baitu bonbardaketaren ostean zutunik iraun zuen apurra mantentzea.
Mezu hau dagokionari heltzea espero dugu eta Lidl-ek gure memoria kolektiboaren osagai garrantzitsu hau babesten laguntzea.
Zuen erantzunaren zain, eskerrik asko aldez aurretik zuen arretarengatik.
Agur bero bat.
